Ыам ыйын 18 күнүгэр Баатаҕай нэһилиэгэр Пионерия күнүн көрсө, Саха сиригэр пионерскай хамсааһын тэриллибитэ 100 сылыгар аналлаах БУДЬ ГОТОВ! ВСЕГДА ГОТОВ!

Ыам ыйын 18 күнүгэр Баатаҕай нэһилиэгэр Пионерия күнүн көрсө, Саха сиригэр пионерскай хамсааһын тэриллибитэ 100 сылыгар аналлаах “БУДЬ ГОТОВ! ВСЕГДА ГОТОВ!” тэрээһин С.Ф. Сивцев аатынан “Түмэн” НАК, М.К. Федорова аатынан олохтоох библиотека уонна Н.Н. Тарскай аатынан Баатаҕай орто оскуолата тэрийиилэринэн айылҕаҕа тахсан, бэрт тэрээһиннээхтик ааста.

Ол курдук “Спорт Албан аат” музей фондатыттан олохтоох библиотека сэбиэдиссэйэ Пермякова А.П. быыстапканы туоруорда

Үөрүүлээх чааһы сатабыллаах, кыһамньылаах үлэни тэрийбит, старшай пионер баһаатай Дмитриева Светлана Семеновна өрө көтөҕүллүүлээхтик салайан ыытта. Этэрээт хамандыырдара аалай хаалтыстарын баанан, барабаан дохсун тыаһынан Пионерскай маршировканан киирдилэр. Валя Котик аатынан этэрээт — командира Румянцева Ксения Иннокентьевна, Сима Сергеев аатынан этэрээт — командир Готовцева Светлана Дмитриевна, Вова Дубинин аатынан этэрээт — командир Гоголева Саргылана Павловна, “Движение первых” оҕо хамсааһынын этэрээтэ — командир Аманатов Айтал буоллулар.

Баатаҕай нэһилиэгэ олохтоох бэйэни салайыныы дьаһалтатын солбуйар баһылыга Петрова А.П. эҕэрдэлээн туран, ветеран пионердарга үөрүүлээх быһыыга-майгыга Саха сиригэр пионерия тэриллибитэ 100 сылыгар аналлаах үбүлүөйнэй бэлиэлэрин туттарда. Бүтүн Союзтааҕы лааҕырдарга сынньаммыт пионердар ааттарыттан Гоголева С.П. бэйэтин ахтыытын уонна эҕэрдэтин тиэртэ. “Движение первых” оҕо хамсааһынын оҕолоро ҕэрдэлээтилэр уонна урукку кэм пионердарыгар открытка бэлэхтээтилэр.

Бары мустубут ыалдьыттары тэрийээччилэр ааттарыттан минньигэс миининэн уонна итии чэйинэн күндүлээтибит. Ол кэннэ этэрээттэринэн, хамаанданан, биирдиилээн оҕо сааһы санатар оонньуулар буоллулар.

Эдэр көлүөнэ аатыттан холобур оҥостор ытык-мааны аҕа көлүөнэ дьоммутун үтүө сыһыаҥҥыт, сүбэҕит-амаҕыт, кэрэҕэ уһуйуугут, истиҥ кыһамньыгыт иһин барҕа махталбытын тиэрдэбит!

Ыам ыйын 19 күнэ — Пионерия күнэ — пионер кэккэтигэр киирэн, аалай кыһыл хаалтыһы бааммыт, Ленин мэтириэттээх значогу иилиммит, барабаан, гуорун тыаhынан биир кэккэҕэ хаампыт пионердары уонна пионер баһаатайдары өссө төгүл истиҥник эҕэрдэлиибит! Баҕарабыт чэгиэн туругу, иллээх-эйэлээх ыраас халлааны, убаастабылы, тапталы, махталы!