"Ыллаа- туой, Маай бырааһынньыга!" тэрилтэлэринэн күрэх сонуннара.

"Ыллаа- туой, Маай бырааһынньыга!" тэрилтэлэринэн күрэх сонуннара.

Ыам ыйын 1 күнүгэр Баатаҕай сынньалаҥ киинигэр үлэ дьонун уруйдаатылар.
Баатаҕай нэһилиэгин тэрилтэлэрин кэлэктииптэрэ үлэҕэ бэриниилээх буолууга, Дьааҥыбыт улууһа, Баатаҕайбыт сайдарыгар, кэскилин түстүүр соруктаах хардыыларга кыттыһан сүрдээх бэрт тэрээһиҥҥэ актыыбынай кыттыыны ыллылар.
Үлэ киһитэ куруук инники күөҥҥэ сылдьарын бэлиэтээн, Баатаҕай сынньалаҥ киинин директора Саргылаана Максимовна Данилова уонна кини барыга бары дьоҕурдаах исписэлиистэрэ биир улахан тэрээһини иилээн - саҕалаан, тэрийэн ыыттылар.
Бастаан утаа олохтоохтору, бука бары мустан олорор ыалдьыттары итии - истиҥ эҕэрдэ тылларынан эҕэрдэлээтэ оройуоннааҕы депутаттар Сэбиэттэрин бэрэсэдээтэлэ Екатерина Васильевна Ноговицына. Кини Дьокуускайга, Москубаҕа, Санкт-Петербурга Дьааҥы салайааччыларын кытта хайдах айаннаан, үлэлээн, уопут атастаһан кэлбиттэрин, инники үлэлэрин былааннаабыттарын туһунан кылгастык билиһиннэрдэ.
Патриотизм диэн баар буолуохтаах. Онтуката суох хас биирдии олохтоох киһи силистэриттэн, тирэҕиттэн матар. Патриотизм киһи төрөөбүт түөлбэтиттэн, оҕо сааһа ааспыт, үөрэммит, үлэлээбит сирдэриттэн саҕаланарын өйдөөн хас биирдии истиҥ эҕэрдэ тыллары болҕойон олорон иһиттибит. Бөһүөлэгин үлэһит дьонун сэргэтин эҕэрдэлээтэ Баатаҕай баһылыгын солбуйааччыта
Ньургун Эрэсович Тулуш, салгыы иһиттибит Улуустааҕы Үөрэх профсоюзнай тэрилтэтин бэрэсэдээтэлин СмирноваТатьяна Сергеевна эҕэрдэ тылларын, Улуустааҕы балыыһа профсоюһун бэрэсэдээтэлин Никифорова Галина Геннадьевна алгыс тылларын. Кини үчүгэй көрдөрүүлээх үлэһиттэригэр, ону тэҥэ бэтэрээннэригэр добун уонна хайҕал суруктары, бэлэхтэри туттартаан кэллэктиибин дьонун бэркэ диэн үөртэ, санааларын көтөхтө.
Бырааһынньыгы иилээн - саҕалаан ыытта Култуурабыт биир талааннаах, айар улэни өрө туппут исписэлииһэ Прасковья Николаевна Антонова.
Эҕэрдэ ырыалар, үҥкүүлэр кэннилэриттэн тэрилтэлэринэн 3 түһүмэхтээх, ырыалаах - тойуктаах күрэх саҕаламмыта. Бииртэн биир сонун, кэрэхсэбиллээх толоруулары көрөн астынныбыт, дуоһуйдубут.
Бу тэрээһиҥҥэ ордук, сценкалары көрөн күлүү-салыы элбээн, бэркэ диэн үөрдүбүт - көттүбүт. Сценкалары аныгы тэтимҥэ иккис тыын биэрэн көрдөрдүлэр.
Балыыһа кэлэктиибин сценката, оскуола эдэр учууталларын үҥкүүлэрэ, Улуустааҕы үөрэх тэрилтэтин үлэлэрин сырдаппыт клиптэрэ, Улуустааҕы бибилэтиэкэ үлэһиттэрин толоруулара көрөөччүлэр биһирэбиллэрин ылыахтарын ыллылар.
Хас түһүмэх аайы Ийэ дойдуга, үлэһит дьону, хорсун санааны, үлэҕэ-олоххо тапталы, бэриниилээх буолууну, истиҥ сыһыаны хоһуйар, олох кырдьыгын көрдөрөр түгэннэр көстөн аастылар.
Ханнык баҕарар кэмҥэ маннык күүстээх, дириҥ суолталаах тэрээһиннэр дьон өйүн - санаатын күүһүрдэллэр, сайыннараллар, духуобунас таһымын үрдэтэллэр.
Ордук кэрэхсэбиллээҕэ диэн оҕолорбут, эдэр ыччаттарбыт, бу маннык үлэни, үөрэҕи өрө тутар бырааһынньыктартан, киһилии сиэрдээх, үтүө майгылаах, бэйэ - бэйэҕэ харыстабыллаах, төрөөбүт дойдуга бэриниилээх буоларга иитиллэн тахсарын өйдөөн, эдэр, эрчимнээх, элбэх саҥа сүүрээннэрдээх, сонун бырайыактардаах Саргылаана Максимовна Данилова тэрийэр дьоҕурун бэлиэтии көрдүбүт.
Дьэ, бу тус үлэтигэр олус бэриниилээх салаайааччы буоларын көрдөрбүтэ элбэҕи туоһулуур.
Эҕэрдэ ырыалар, үҥкүүлэр кэннилэриттэн дьүүллүүр сүбэ түмүгүн иһиттибит. Бу тэрээһиҥҥэ барыта 150 киһи кыттыыны ылбыт эбит. Бу аата норуот уһуктан, патриотизм, духуобунас күүскэ сайдан эрэрин көрдөрдулэр.
Дохсун ытыс тыаһынан доҕуһуоллатан
1-гы миэстэни ыллылар Улуустааҕы балыыһа кэллэктиибэ (Салайааччы: Докторов В.И.). Салгыы 2 миэстэ тигистэ Улуустааҕы үөрэх тэрилтэтигэр (Салайааччы: Юмшанов И.С.), 3 миэстэни ыллылар Улуустааҕы бибилэтиэкэ киинин үлэһиттэрэ (Салайааччы: Лебедова А.А.). Онтон, арыый чуумпуран, иһийэн-иһиллэнэн ыллыбыт. Дьэ, саамай Кылаан кыайыылааҕынан буоллулар Баатаҕай орто оскуолатын кэллэктиибэ (Дириэктэр: Григорьева Л.Н. ) диэн иһитиннэрбиттэригэр бука бары үөрүүлээх дохсун ытыс тыаһынан доҕуһуоллатан, саҥа таһааран үөрүүлэрин үллэстэн өрө чөрөйө түстүлэр. Учууталлар маладьыастар. Улууспут иһинэн ыытыллар бары күрэхтэргэ куруутун инники күөҥҥэ сылдьалларыттан киэн туттабыт.
Ити курдук, бука бары биир тыынынан Баатаҕайбыт тэрилтэлэрин үлэһит, барыга бары дьоҕурдаах, талааннаах дьонун -сэргэтин билэн хааллыбыт. Онон, бэрт сэргэх тэрээһиннээх Маай бырааһынньыгын үөрэ - көтө көрүстүбүт.

Туругурдун Эйэ, Үлэ, Маай бырааһынньыга!
Туругурдун дьоллоох олох!
Бука бары бу курдук эрчимнээх, бигэ туруктаах санааҕытынан хардыылаан өрүүтүн үүнэ, чэчирии, сайда туруҥ!

Стручкова А.Н.,
Баатаҕай орто оскуолатын учуутала.

01.04.26 сыл.