Дьоруойдар ааттара чиэстэнэр, дьоруойдар ааттара умнуллубат

Дьоруойдар ааттара чиэстэнэр, дьоруойдар ааттара умнуллубат.

Ахсынньы 12 күнүгэр Баатаҕай орто оскуолатыгар "Дьоруой паартата" тэрээһин аһыллыыта олус долгутуулаахтык буолан ааста.
Бу тэрээһин бүтүн Арассыыйатааҕы "Дьоруой паартата" бырайыак чэрчитинэн ыытылынна.
Бу күн Баатаҕай орто оскуолатын выпускниктарыгар, хорсун хоодуот уолаттарбытыгар, ол эбэтэр Анал Байыаннай Дьайыы кыттыылаахтарыгар, дьоруойдарыгар аналлаах истиэндэни, дьоруой паартатын аһыллыыларын бэлиэтээтибит.
Хорсун быһыылар умнуллубаттар,
өйбүтүттэн - санаабытыттан сүппэттэр.
Өрөгөй ырыаларын бука бары илиибитин түөспүтүгэр тутан туран олус долгутуулаахтык, боччумнаахтык киэн тутта толордубут, иһиттибит.
Баатаҕай орто оскуолата бэйэтэ туспа олус баай историялаах уонна үтүө үгэстэрдээх. Оскуолабыт кэрэ уонна сырдык түгэннэрин киһи ааҕан сиппэт, ол эрэн сүтүктээх ыар да күннэр баалларын бука бары билэ олордохпут.
Биһиги, бу күн дьоруойдарбытыгар, хонууга охтубут 23 үөрэнээччилэрбит аҕаларыгар, дириҥник курутуйан туран, кинилэр хорсун быһыыларын хаһан да умнуо суохпутун туһунан мэктиэ тылбытын биэрдибит.
Биһиги норуоппут үс араас сэриини ааспыта, Аҕа Дойду, Афганистаан уонна Чечня сэриилэрин. Бу ыар сэриилэргэ кыттыыны ылбыт эһэлэрбит, аҕаларбыт, бу бүгүҥҥү буола турар Анал Байыаннай Дьайыы сэриитэ буолуо диэн өйдөрүгэр да суоҕа. Кинилэр бука бары эйэлээх, дьоллоох олох иһин олохторун толук уурбуттара.
Билигин биһиги эйэлээх олоххо санаабытын түһэрбэккэ тардыһыыбыт күүһүрүөхтээх диэн эрэнэ саныахтаахпыт.
Төһө да иирсээннээх быһыы - майгы саҕаламмытын иһин, ис турукпутун күүһүрдэн эйэ - дьол иһин
дьулуһуохтаахпытын өйдүөх тустаахпыт.
Биһиги хас биирдии киһиэхэ долгутуулаах күннэр үүммүттэрин сэрэйэ, билэ - көрө сырыттарбыт да Ийэ Дойдубутун көмүскүүр аналлаахпытын умнубаппыт.
Бука бары, өйдөөҥ! Ийэ Дойдубут туһугар хас биирдиибит көмүскэлгэ турунуохтаах, хас биирдиибит норуотун туһугар кыһаллыахтаах!
Биһиэхэ бука барыбытыгар төрөөбүт дойдубут төрөппүт ийэбит кэриэтэ күндү. Онон төрөөбүт дойду - төлкөбүт түстэнэр биһигэ буолар, ону умнуо суохтаахпыт.
Сэрии туһунан кэпсэтии олус ыарахан, санаа түһүүлээх, харах уулаах, долгутуулаах. Биһиги дьоруойдарбыт, оскуолабытыгар үөрэнэн ааспыт выпускниктарбыт хаһан эрэ оҕо сылдьан дьоллоох да кэрэ кэмнэрэ элэс гынан аастахтара. Кинилэри ахтан - санаан ыллыбыт. Төрөппүттэрэригэр, чугас дьонноругар, оҕолоругар, үөрэппит учууталларыгар ыарахан да күн буолан ааста. Орто Дойдуттан эмискэ сэрии сэбиттэн сутэриэхпит диэн
өйбүтүтүгэр - санаабытыгар да суоҕа. Саныырга ыарахан...
"Дьоруой паартата " турарын көрөн харах уулара тоҕуннулар. Ол, эрэн хас биирдии дьоруой, Ийэ Дойдутун иһин олоҕун анаабыт саллаат аата хаһан да умнуллуо суоҕун бука бары билэбит. Паарта аттыгар туран дьоруойдарбыт ийэлэрэ, кэргэттэрэ, аймахтара, үөрэппит учууталлара тыл эттилэр.
Бастакы тыл бэрилиннэ Улуустааҕы Үөрэх тэрилтэтин салайааччытын солбуйааччыта Иван Николаевич Попов, салгыы Баатаҕай бөһүөлэгин баһылыгын солбуйааччыта Ньургун Эрэсович Тулуш уонна Баатаҕай орто оскуолатын дириэктэрэ Людмила Николаевна Григорьева. Онтон салгыы сэрии толоонугар Ийэ Дойдуларын туһугар олохторун сүтэрбит, хорсун - хоодуот дьоннорун туһунан кэпсээтилэр Хальвинская Наталия Васильевна, Потапова Лариса Викторовна, куораттан анаан - минээн кэлбит Наталья Алексеевна Пахомова.
Ис сүрэхпититтэн долгуйан туран дьоруойдарбытыгар сүгүрүйэбит, хас биирдиибит кинилэр төрөппүттэригэр бохулуоннуубут.
Уруй буоллун Ийэ Дойдубутун көмүскээччилэргэ, дьоллоох олох туһугар туруулаһааччыларга!
Айхал буоллун дьоруойдарга, Орто дойдуга эйэ иһин охсуһаччыларга!

Стручкова А.Н., Баатаҕай орто оскуолатын учуутала.

12.12.25 сыл.