"Ийэ уонна оҕо " күрэҕин сонуннара

"Ийэ уонна оҕо " күрэҕин сонуннара.

"Ийэ" диэн тылы ама ким билбэтий, минньигэс бу тылы, аан маҥнай саҥаран эппитин.
Ама ким таайбатый, бу сылаас сарыалы, сандаара сыдьаайар мичээри? Ийэ сылаас илиитигэр, кини сырдык мичээригэр туох да тэҥнэспэт.
Ийэ барахсан күн сирин көрдөрбүт күндү көмүс киһибит. Кини баарын тухары утуйар уутун умнан, сылайары билбэккэ биһиги туспутугар сүүрэр-көтөр, кыһаллар, дууһатын ууран туран олоҕун кэрэтин барытын аныыр аналлаах.
Сэтинньи 22 күнүгэр ийэлэрбитигэр анаан - минээн Баатаҕай орто оскуолатыгар "Ийэ уонна оҕо " диэн биир кэрэ бырааһынньык ыытыллан ааста.
Бырааһынньыкка мустубут ыалдьыттарбытыгар, күн күбэй ийэлэрбитигэр анаан, ийэ туһунан нарын ырыалар ылланнылар, истиҥ эҕэрдэ тыллара этилиннилэр.
Бу кэрэ бырааһынньык күрэҕэр кыттыыны ыла кэлбит ийэлэри уонна оҕолору уруйдаан - айхаллаан билиһиннэрэн туран, иилээн - саҕалаан ыытта Айаана Еремеевна Куприянова.
Бастакы түһүмэхпит "Ийэбинээн астыыбын" диэн ааттаммыт эбит. Манна оҕолор дьиэлэригэр ийэлэрин кытта бииргэ астаабыт астарын хайдах астаабыттарын сиһилии кэпсээн көмүскээтилэр. Хас биирдии кыттааччы оҕо олус чобуотук, кыһаллан аҕай бэйэлэрэ астаабыт астарын рецебын үөрэ - көтө кэпсээтилэр.
Оҕолорбутуттан араас ас астааһын кистэлэҥ ньымаларын биллибит - көрдүбүт. Бу түһүмэххэ астаабыт астарын бастакынан билиһиннэрэ
1 "А" кылаас
(Сал: Ефимова Т.Е. ) үөрэнээччитэ Юрианна Гатилова. Кини ийэтинээн алаадьы уонна саламаат астаан аҕалбыттар. Кыысчаан бэрт холкутук кэпсээтэ. Арааһа куруутун астыыр астара эбит быһыылаах. Салгыы
1 "Б" кылаас
(Сал:Ощепкова В.П. ) үөрэнээччитэ Тимур Попов "Лаваш" диэн аһы хайдах онорбуттарын билиһиннэрдэ. Онтон 2 "А" кылаастан (Сал: Рязанская В.Н. ) Артур Сотрудников "Кексики" аһын хайдах астаабыттарын туһунан кэпсээтэ. Уолбут сытыыта сүрдээх, тыла - өһө баайа сөхтөрдө. Кини кэнниттэн 2 "Б" кылаас кыысчаана (Сал: Данилова С.Н.) Алина Онофрейчук мүөттээх туордун билиһиннэрдэ. Эчи туортара көстүүтэ улахана сөхтөрдө. Салгыы
3 "А" кылаас үөрэнээччитэ (Сал: Максимова Л.И. ) Артем Слепцов чебурекаларын рецебын кытта билсистибит. Уолбут астыы үөрэхтээҕэ, ийэтэ асчыта тута билиннэ. Онтон 3 "Б" кылаас кыысчаана (Сал: Потапова К.Д. ) Каролина Каурцева балыктан минньигэстик да минньигэстик астаабыт астарын күндүүлээн үөртэ. 4 "А" (Сал: Горохова Я.С. ) Камилла Новожилова дьоппуон норуотун аһын билиһиннэрдэ. Кини кэнниттэн
4 "В" кылаас үөрэнээччитэ (Сал: Стручкова А.Н. ) Сайаана Данилова ийэтинээн саамай сөбүлээн астыыр астарын улахан да улахан пельменнэрин аҕалан амсаттылар. Сайаана сүрдээх истиҥник, сэмэйдик оргууй аҕай кэпсээн бастакы түһүмэх бэрт холкутук түмүктэннэ.
Иккис түһүмэх аата "Литератураны төһө билэҕин?" диэн этэ. Манна да ийэлэр уонна оҕолор бэйэ - бэйэлэриттэн хаалсыбатылар.
Үһүс түһүмэх
"Музыка кэрэ эйгэтэ" диэҥҥэ ананна.
Бу түһүмэххэ оҕолор ийэлэрин кытта ыллаатылар, үҥкүүлээтилэр. Чахчы даҕаны хас биирдии оҕо, ийэ олус талааннаахтарын, дьоҕурдаахтарын бу түһүмэххэ биллибит. Хас биирдии оҕоҕо күн күбэй ийэтэ, күн курдук күлүмнээн көһүннэ, кэрэ сибэкки буолан тэтэрдэ.
Салгыы "Ийэни төһө бэркэ билэҕин?" диэн түһүмэххэ элбэх ыйытыыларга эппиэттээннэр долгуйдулар да, сэмээр толкуйга да түһэн мунчааран ылаталаатылар. Ити курдук бырааһынньыктааҕы курэхпит биир тыынынан бэрт сэргэхтик түмүктэннэ.
Дьүүллүүр сүбэ үлэлиир кэмигэр ийэлэр оҕолорун кытта эҕэрдэ ырыаларынан ийэлэри, ыалдьыттары эҕэрдэлээтилэр.
"Ийэ уонна оҕо" күрэҕин түмүгэ маннык буолла:
Навита Викторовна уонна Камилла Новожилова,
4 "А" ( Сал: Горохова Я.С. ) кыайыылааҕынан таҕыстылар.
2 миэстэҕэ тигистилэр - Христина Алексеевна уонна Тимур Попов,
1 "Б" ( Сал: Ощепкова В.П. ).
3 миэстэни ыллылар Майя Евгеньевна уонна Каролина Каурцева,
3 "Б"( Сал: Потапова К.Д. ).
Салгыы анал ааттаах добун суруктар туттарылыннылар Анжелика Александровна Гатиловаҕа, Саргылана Максимовна Даниловаҕа, Елена Сергеевна Леяҕа, Татьяна Андреевна Бурнашеваҕа уонна Матрена Дмитриевна Сотрудниковаҕа.
Махтал бу бүгүҥҥү күммүт кыттыылаахтарыгар, оҕолорбут учууталларыгар уонна тэрийээччилэргэ бука барыларыгар.
Ханна да бардаргыт - ылыҥ ийэҕит алгыһын, ханна да буолларгыт -
ийэҕитин куруутун санааҥ!
Күндүттэн күндүнү, кэрэттэн кэрэни, күөх сирэм сир күнүн -
таптыаҕын Ийэни!
Ийэлэргэ уруй буоллун!
Ийэлэргэ айхал буоллун!

Стручкова А.Н., Баатаҕай орто оскуолатын учуутала.

22.11.25 сыл.