Элгэс сиригэр - Дойду үрдүк наҕараадатын "Орден Мужества" туттарыы буолла
Муус устар ый 06 күнүгэр Элгэс нэһилиэгэр патриотическай хабааннаах улахан тэрээһин үрдүк таһымҥа ыытылынна. "Верхоянскай оройуон" Аҕа баһылыга В.М.Иванов уонна "Верхоянскай уонна Эбээн-Бытантай оройуоннарын байыаннай комиссариата" э.т. Г.Н.Никифорова кэлэннэр биир дойдулаахпыт, Ийэ дойдутун көмүскүү сылдьан, анал байыаннай дьайыыга хорсуннук охтубут Василий Алексеевич Рожин төрөппүттэригэр Людмила Васильевна уонна Алексей Петрович Рожиннарга уолларыгар Василийга анаммыт, РФ Президенэ В.В.Путин илии баттааһыннаах государственнай наҕарааданы "ОРДЕН МУЖЕСТВА" туттардылар. Василий Рожин олоҕун, үлэтин, айар дьоҕурун туһунан үөрэппит учууталлара, дойдутун дьоно ахтыылары оҥордулар, кини хоһоонноруттан аахтылар, ырыа буолбут хоһоонноро дьон дууһатын долгутта, араас тэрээһиннэргэ кыттыбыт, эдэр-оҕо саастарын видеоларын көрдөрдүлэр. Улуус баһылыга В.М.Иванов чаҕылхай, хорсун уолу ииппиттэригэр Василий төрөппүттэригэр махтал тылларын эттэ. Оҕолуун-улаханныын сүһүөхтэригэр туран сүгүрүйдүлэр. "...Тыыннаахпын суруйбут тылларбар, иһиллиэм хас биирдии дорҕооммор" Василийга анаммыт "Этитии" хоһоонунан тэрээһини иилээн-саҕалаан ыытта Василий үлэлээбит оскуолатын коллективыттан учуутал Т.Д.Горохова.