Ыам ыйын 9 күнүгэр Баатаҕайга Улуу Кыайыы өрөгөйдөөх бырааһынньыга буолан ааста

Ыам ыйын 9 күнүгэр Баатаҕайга Улуу Кыайыы өрөгөйдөөх бырааһынньыга буолан ааста. Н.Н.Тарскай аатынан Баатаҕай орто оскуолатын үөрэнээччилэрэ, үлэһиттэрэ бу тэрээһиҥҥэ көхтөөх кыттыыны ыллыбыт. Сарсыарда, үгэс быһыытынан, Н.Н.Тарскай бюһугар линейка буолла, оскуолабыт выпускниктара уонна "Спорт албан аат" түмэл тэрийээччитэ, педагогическай үлэ бэтэрээнэ, гражданскай килбиэн хаһаайына Ксения Иннокентьевна Румянцева сибэкки уурдулар.
Парадка коллектив үлэһиттэрэ единай форма кэтэн Тарскай уулуссатыттан Кыайыы болуоссатыгар диэри бырааһынньыктааҕы парадка хаамтыбыт. Үөрэнээччилэр "Өлбөт үйэлээх полка" акцияҕа кыттан Баатаҕай нэһилиэгиттэн Аҕа дойду сэриитин кыттыылахтарын, тыыл бэтэрээннэрин портреттарын тутан хаамтылар, Кыайыы болуоссатыгар ыытыллыбыт миитиҥҥэ Кыайыы гирляндатын уурдулар, 3 кылаас үөрэнээччилэрэ монтаж ааҕан Сэрии кэмин оҕолорун, сэрии, тыыл бэтэрээннэрин оҕолорун, Анал байыаннай дьайыыга сылдьар буойуттар дьиэ-кэргэннэрин уонна бары мустубут нэһилиэк олохтоохторун эҕэрдэлээтилэр, кыргыттар уонна уолаттар ансаамбыллара бырааһынньыктааҕы көлүөнэлэр кэнсиэрдэригэр кыттыыны ыллылар.
Улуу Кыайыы 80 сылынан эҕэрдэ тэрээһини үйэтитэн хаартыскаҕа түстүбүт.
Оҕолорбут, ыччаттарбыт Кыайыы күнүн суолтатын инникитин да өрө тутуохтара диэн эрэллээхпит.

#Росдетцентр
#оВеликойПобедеНД